ปฏิคฺคเหสิ ๑ ภควา สพฺพญฺญู ๒ โลกนายโก มม จิตฺตํ ปสาเทนฺโต ปริภุญฺชิ มหามุนิ ฯ ปริภุญฺชิตฺวาน สมฺพุทฺโธ สตฺถวาโห อนุตฺตโร สกาสเน นิสีทิตฺวา อิมา คาถา อภาสถ ฯ เย จ สนฺติ สมีตาโร ๓ ยกฺขา อิมมฺหิ ปพฺพเต อรญฺเญ ภูตคณา สพฺเพ ๔ สุณนฺตุ วจนํ มม ฯ โย โส พุทฺธํ อุปฏฺฐาสิ มิคราชํว เกสรึ ตมหํ กิตฺตยิสฺสามิ สุณาถ มม ภาสโต ฯ เอกาทสญฺจ ขตฺตุํ โส เทวราชา ภวิสฺสติ จตุตฺตึสติขตฺตุญฺจ จกฺกวตฺติ ภวิสฺสติ ฯ กปฺปสตสหสฺสมฺหิ โอกฺกากกุลสมฺภโว โคตโม นาม โคตฺเตน สตฺถา โลเก ภวิสฺสติ ฯ อกฺโกสิตฺวาน สมเณ สีลวนฺเต อนาสเว ปาปกมฺมวิปาเกน นามเธยฺยํ ลภิสฺสติ ฯ ตสฺส ธมฺเมสุ ทายาโท โอรโส ธมฺมนิมฺมิโต กุณฺฑธาโนติ นาเมน สาวโก โส ภวิสฺสติ ฯ ปวิเวกํ อนุยุตฺโต ฌายี ฌานรโต อหํ โตสยิตฺวาน สตฺถารํ วิหรามิ อนาสโว ฯ สาวเกหิ ๕ ปริวุโต ภิกฺขุสงฺฆปุรกฺขโต ภิกฺขุสงฺเฆ นิสีทิตฺวา สลากํ คาหยี ชิโน ฯ #๑ ม. ยุ. ปฏิคฺคเหตฺวา ฯ ๒ ยุ. ตํ ผลํ ฯ ๓ ยุ. เย วสนฺติ สเมตาโร ฯ #๔ ม. ยุ. อรญฺเญ ภูตภพฺยานิ ฯ ๕ ยุ. สาวกคฺเคหิ ฯ