จตุตฺถํ สนฺนิฏฺฐาปกตฺเถราปทานํ (๔๔)

---

[๔๖] อญฺเญ กุฏิกํ กตฺวา วสามิ ปพฺพตนฺตเร ลาภาลาเภน สนฺตุฏฺโฐ ยเสน อยเสน จ ฯ ปทุมุตฺตโร โลกวิทู อาหุตีนํ ปฏิคฺคโห ภิกฺขุสตสหสฺเสหิ ๑ อาคญฺฉิ มม สนฺติเก ฯ อุปาคตํ มหานาคํ ๒ ชลชุตฺตมนามกํ ติณสนฺถรํ ปญฺญาเปตฺวา อทาสึ สตฺถุโน อหํ ฯ ปสนฺนจิตฺโต สุมโน อามณฺฑํ ปานิยญฺจหํ อทาสึ อุชุภูตสฺส วิปฺปสนฺเนน เจตสา ฯ กปฺเป อิโต สตสหสฺเส ยํ ทานมททึ ตทา ทุคฺคตึ นาภิชานามิ อามณฺฑสฺส อิทํ ผลํ ฯ เอกตาฬีสกปฺปมฺหิ เอโก อาสิ อรินฺทโม สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สนฺนิฏฺฐาปโก เถโร อิมา คาถาโย อภาสิตฺถาติ ฯ สนฺนิฏฺฐาปกตฺเถรสฺส อปทานํ สมตฺตํ ฯ #๑ ม. ยุ. วีสสตสหสฺเสหิ ฯ ๒ ยุ. มหาวีรํ ฯ