อาโรปิเตว ๑ จิตเก เวหาสํ นภมุคฺคมิ อากาสจฺฉทนํ กตฺวา จิตกมฺหิ อธารยึ ฯ เอกนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ สตฺตตาฬีสิโต กปฺเป ปทุมิสฺสรนามโก จาตุรนฺโต วิชิตาวี จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปทุมจฺฉทนิโย เถโร อิมา คาถาโย อภาสิตฺถาติ ฯ ปทุมจฺฉทนิยตฺเถรสฺส อปทานํ สมตฺตํ ฯ สตฺตมํ สยนทายกตฺเถราปทานํ (๔๗)

---

[๔๙] สิทฺธตฺถสฺส ภควโต เมตฺตจิตฺตสฺส ตาทิโน สยนคฺคํ มยา ทินฺนํ ทุสฺสภณฺเฑน ๒ อตฺถตํ ฯ ปฏิคฺคเหสิ ภควา กปฺปิยสยนาสนํ อุฏฺฐาย สยนา ตมฺหา เวหาสํ อุคฺคมี ชิโน ฯ จตุนวุเต อิโต กปฺเป ยํ สยนมทาสหํ ทุคฺคตึ นาภิชานามิ สยนสฺส อิทํ ผลํ ฯ #๑ ม. ยุ. อาโรปิเต จ ฯ ๒ ม. ยุ. ทุสฺสภณฺเฑหิ ฯ