ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โอปวุโยฺห เถโร อิมา คาถาโย อภาสิตฺถาติ ฯ โอปวุยฺหตฺเถรสฺส อปทานํ สมตฺตํ ฯ ฉฏฺฐํ สปริวาราสนตฺเถราปทานํ (๕๖)

---

[๕๘] ปทุมุตฺตรพุทฺธสฺส ปิณฺฑปาตํ อทาสหํ คนฺตฺวา กิลิฏฺฐกฏฺฐานํ ๑ มลฺลิกาหิ ปริกฺขิตํ ฯ ตมฺหาสนมฺหิ อาสีโน พุทฺโธ โลกคฺคนายโก อกิตฺตยิ ปิณฺฑปาตํ อุชุภูโต สมาหิโต ฯ ยถาปิ ภทฺทเก เขตฺเต พีชํ อปฺปมฺปิ โรปิตํ สมฺมา ธารํ ปเวจฺฉนฺโต ผลํ โตเสติ กสฺสกํ ฯ ตเถวายํ ปิณฺฑปาโต สุเขตฺเต โรปิโต ตยา ภเว นิพฺพตฺตมานมฺหิ ผลนฺเต ๒ โตสยิสฺสติ ฯ อิทํ วตฺวาน สมฺพุทฺโธ ชลชุตฺตมนามโก ปิณฺฑปาตํ คเหตฺวาน ปกฺกามิ อุตฺตรามุโข ฯ สํวุโต ปาฏิโมกฺขสฺมึ อินฺทฺริเยสุ จ ปญฺจสุ ปวิเวกมนุยุตฺโต วิหรามิ อนาสโว ฯ #๑ ยุ. คนฺตฺวา ตํ โภชนฏฺฐานํ ฯ ๒ ยุ. ผลโต ฯ